شعارنا هو “نداء الطبيعة بالطبيعة”، لذلك نحرص تكون كل تجربتنا مرتبطة بالبساطة وجمال الطبيعة. لكن بنفس الوقت، نهتم بالراحة والنظافة، خصوصًا للبنات، ولهذا احنا موفرين خيمة حمّام 🚾 نظيفة ومجهزة بكل الاحتياجات الأساسية، حتى تكون التجربة ممتعة ومريحة للجميع 🌿✨

إحنا نوفر تجهيزات تخييم كاملة، من الخيمة والسليب والفراش إلى أدق التفاصيل، حتى ما تحتاج أي شيء إضافي أثناء الرحلة. هدفنا نوفرلك تجربة متكاملة وآمنة، تركز بيها على الاستمتاع بالطبيعة والونسه، وإحنا نهتم بكل الجوانب اللوجستية عنك.

إحنا نهتم كلش باختيار أماكن التخييم، وكل موسم نختار مكان يختلف، حسب حالة الجو
و أغلب الأماكن اللي نروحلها ما تكون سياحية، بالعكس تكون بوسط الجبال والغابات، بأماكن بعد ما واصلها أحد، وبعضها حتى ما بيها شبكة أو إنترنت، حتى تعيشون تجربة تخييم حقيقية وتبتعدون شوي عن ضغط الحياة، وتغوصون بجمال الطبيعة بكل هدوئها وصفاءها. 

التسجيل يصير حصراً من خلال موقعنا الإلكتروني، وبعدها نسوي فلترة للمشاركين ونختار المغامرين بعناية، لأن التخييم ويانا جماعي، وكلشي نتشارك بيه من الطبخ للتجهيز، فنهتم كلش بنوعية الناس اللي تشارك ويانا.
بهالطريقة نضمن جو مريح وممتع للكل، وتكون التجربة أرقى وأغنى، وهذا أكثر شي يميزنا ويخلي كل رحلة عدنا بيها ونسه وقيمة حقيقية ما تنسي.

بما إن رحلاتنا بيها طابع مغامرة وتخييم، فاحنا مجهزين الكم سيارات دفع رباعي حديثة 4x4 مجهزة ومريحة، لأن الأماكن اللي نروح لها عادة تكون بعيدة وبطرق ترابية أو جبلية. فإحنا نختار سيارات تتحمل الطريق وتوصّلنا لأبعد نقطة بأمان وراحة، حتى ما نحس بالتعب ونظل نركز على متعة الرحلة وجمال الطبيعة هناك.

أكيد، الأكل علينا و 3 وجبات باليوم ولأن احنا العراقيين كلش نحب الأكل ف كلش حريصين عليه و جزء مهم من التجربة و عدنا شيف مختص يجهزلنا أكل كلش طيب بكل رحلة، وبيه تنوّع
وهواي من المشاركين يرجعون يعيدون الرحلة بس علمود الأكل الي يسويه أحمد

أكيد، إحنا نخيم بأماكن طبيعية، فوجود بعض الحيوانات شي طبيعي لأن هذا مكانهم الأصلي. بس لا تخاف، إحنا مدرّبين ونعرف شلون نتعامل ويه كل أنواع الحيوانات اللي ممكن نصادفها، ونتبع إجراءات سلامة واضحة بكل رحلة.
هذا الشي يخلي التجربة آمنة ومريحة للكل، لأن سلامة المشاركين بالنسبة إلنا هي الأولوية الأولى بكل مغامرة.